Poslovne vesti - Makedonija

Македонија до април ќе има струја од ветер

Раздвиженост на екипите кои во моментов на локација на Ранавец кај Богданци во првиот македонски парк на ветерни електрани работат турбо на монтажа на ветерниците.

Како што информираат од Електрани на Македонија (ЕЛЕМ) проектот е во завршна фаза, а ветерниците ќе бидат ставени во функција најдоцна до април годинава, кога и ќе бидат вклучени во електроенергетскиот систем. Напролет Македонија ќе ги добие и првите киловат-часови електрична енергија кои ќе бидат добиени од производство на ветер. Истовремено, земјава ќе се вброи во европските држави што ја користат оваа "зелена" енергија за производство на струја.

- Целосно се монтирани 10 ветерници, а во моментов во процес на монтажа е единаесеттата - велат од ЕЛЕМ и појаснуваат дека од пристаништето во Солун во просек неделно се пренесуваат по две ветерници, а до крајот на оваа недела ќе пристигне уште една. Компонентите се распоредени во повеќе камиони, а заради габаритноста на деловите транспортот се реализира внимателно и во конвој.

Се работи за турбини кои се производство на Сименс од Данска и се меѓу најдобрите во својата класа. Секоја од овие турбини е со инсталираната моќност од 2,3 мегавати, а висината на столбот е 84 метри.

Ветерниот парк почна да се гради лани во мај, а во меѓувреме се направи целокупната инфраструктура, како и придружните објекти, командна зграда и 20/110 киловолтна трафостаница.

Проектот Богданци" предвидува изградба на 16 ветерни електрани коишто треба да испорачуваат околу 100 гигават-часови природно одржлива енергија, што на годишно ниво е доволно за снабдување на домаќинствата на 60.000 граѓани во земјава.

Инвестицијата е вредна 55,5 милиони евра, а енергетската компанија учествува со 7,6 милиони евра сопствени средства, а останатите 47,9 милиони евра се обезбедени со заем од Владата на Сојузна Република Германија преку КФВ-банката.